Luk 23 | BEF | STEP | Ya hilete enali asaga'i ho tilete Yesuhi le'mete Pailatihi bulo bi'ahana.

Luke 23

Pailatiu Yesuhi ka foya li ete'ahana

Mt 27:1-2, 11-14; Mk 15:1-5; Yn 18:28-38

1 Ya hilete enali asaga'i ho tilete Yesuhi le'mete Pailatihi bulo bi'ahana. 2 Enali hapi fite ka foya li etelete ma lite li'ahana: Lali ya'ma bo bu gota ai nagatimagihi hapa'ani le'mo fato fato suhi hu'ehibe. Ai takisi sipi Lomu bo ya'ma Sisatoga mehe'milo luto laga hu letalina kaga nolina bo yabe. To ai Mesia'ita gihiti bo nohube luto lulata nohina. 3 Ya lago Pailatiu Yesuhi loka ho'ehina: Kai ma'naka luto Mesiaga Yuta bona'magi gihiti bo'ani nohapihe? Ya ligo Yesu Pailatihi ka'alo nona'a lu emito lu'ehina: Kaika alu huto nohane. 4 To Pailatiu i behe huloto sipi monoto bona'i hiti to asaga boana'i minanamagihi ma luto lu epi'ehina: Ma bomofihi foipana'a bu megobe. 5 Ya ligo asaga bona'magi sipi hite kehe ilete ma lite li'ahana: Ai boana'magitoga kaga lu epilago ai ka'auba asaga Yutia kegi'a boana'i enele'mo luba hulata nohina yabe. Ai Galili kapoguti hapi filoto ya'mana suhi humofa'na nohigo yatai ya'malo noabe.

Yesuhi Helotihi bulo ka foya li ete'ahana

6 Pailatiu ana ka'anilo keheliloto ma luto enoloka ho'ehina: Ya'mana boba Galili kapolo bo nohifihe? 7 Enali lu emigo akeheliloto Yesu ai Helotiu kaba hu'ehina melugu bo nohigo keheliloto Helotiu nohinaga Yesuhi ho lifi'ehina. To ya'mana yupahi Helotiu Yelusale hepatoga oloto'a mino'ehina yabe. 8 Helotiu Yesu bu goloto gelo bi'ehibe. Ai Yesuhi ka'ago kehelilata nohuto hena huto ana bo bu galube luto kana yatamalo geba huto mino'ehina. Yesu topa hose'na foya mone li huto hinogo bu galube luto ekesa kehelito minolata hu'ehibe. 9 Ya higo Helotiu Yesuhi kaga babu luto fato fato'i loka ho'ehina yabe. To Yesu Helotihi kaga'alo nona'a lu meemise mino'ehibe. 10 Enali sipi monoto bona'i to keya kagalo keheli bati hi'ahana bona'i enali Yesuhi meha'asilo nehite kaga amuya melete lilete ka foya li ete'ahana. 11 To Helotiu gimi bo'a hiti Yesu kaga foipa foipa'a lu etelete kiya hu ete'ahabe. Ya nehite enali kata mone hetofa fayaha'auba lubo labo lu'ehina katatu'i hepi etelete he'mi etago Pailatiu nohinalo aku'i bu'ehina yabe. 12 Helotiu koyapa'i Pailati hiti fatehi lolo hite minelata hi'aha'ina yabe. Ya hi'aha'ina yatai li koguna i'aha'ibe.

Pailatiu ligo Yesuhi malipu yafalo he'ahana

Mt 27:15-26; Mk 15:6-15; Yn 18:39-19:16

13 To Pailatiu sipi mono bona'i to kibina bona'i to boana'i hiti enele'mo nupa higo enali ete li gehesa hi'ahana. 14 Ya hago ai lu epi'ehina: Lenali ya'ma bo aku'i le'mete nanitoga elete ma lite li'ahabe, ai boanatimagihi bati mehina kaga lu noepina bo yabe. Ya li'ahana nani yatai lenali lenogobisalo mana bouba kegeiyo'na li huto hu'ehilina'mu beloloto bu gona asaga lenali lilete ka foyagu le'me nemalana suhi ai li huto mehu'ehibe. 15 To Helotiu hiti ana huto ya'manamofihi kegeiyo hu'ehilinana'a bu megose nanitoga ho lifigo aku'i le'mete neabe. Lenali kehelilo, to ai ya'ma bouba foipana sipi'a li huto ya huto haluta bati huto yabe to ai sipi foipana li huto mehu'ehinaya hena hibe luto ho fililune. 16 Ya hu'ehinagi nani nagatu'i ya'mana bo biyigiloto'ni gulu hoto he'mi etenogo'ni bilibe. 17 Ya hu'ehina koyapa kanagu suhi mone ma hite mege'i melelata hi'ahana. To Pasa nose'na nelata nehana ya'ma sipi fuli kanagu Pailatiu nagalugu nehana boguti mone'isi enele'mo he'migo bilata hi'ahana yabe. 18 Ya noligo asaga boana'i li nupa hite minanamagi sipi kehe ilete ma lite li'ahana. Ya'ma bo ho nefilite Balabasihi le'mo buto bi letobo. 19 Balabasiu ai gamani bona'magi kaga'mu luto luba li ho tiloto bo mone ho fili'ehinalo nagalugu le'mo malago nominana yabe. 20 To Pailatiu aku'i kehe ito lu epiloto Yesuhi he'mi etenogo bilube'mu hu'ehina. 21 Ya ligo enali kehe napa ilete ma lite li'ahana: Malipu yafalo halo. Malipu yafalo halo. 22 Ya lago aku'i loegi monegi yupahi Pailatiu lu epi'ehina: Lenali hena'mu nelabe? Ai ya'ma bouba hena huse foipana li huto hu'ehibe? Ai'i ho fililuta foipana'a nani bu megona bomu'i lenali halune halune nelabe. Ya hu'ehinagi nani naga osatu'i biyigiloto'ni he'mi etenogo bilibe. 23 Ya ligo enali amuya melete ule'ale hilete sipi kehe ite babu kaga lite ya hite malipu yafalo halune'mu hi'ahabe. To enali sipi kehe ite kaga lanauba Pailatihi ka'a hete le'mo meluga mele'ahana yabe. 24 Ya hago Pailatiu enali lana ka'aniuba hago enali enemege'i moloto enabaga liyafa hilube'mu hu'ehina yabe. 25 Ya'ma bo ai gamani bonatoga luba li huto huloto bona'i enoho fili'ehina bomofihi boana'magi aku'i le'malune lite lago Pailatiu Balabasihi li gulu fo etago bu'ehina. To enali kaga lana enemege'i moloto Yesuhi gimi bomagihi enayanugu molo'ehina yabe.

Yesuhi malipu yafalo he'ahana

Mt 27:32-44; Mk 15:21-32; Yn 19:17-27

26 Enali Yesuhi le'mete kapo melete nebite kapogu bo mone Simoni ai Sailini melugu bo fo telete yato li'ahana. Ai kifiguti oto sipi hepalugu tilube'mu nohina bo yabe. To enali Yesuhi malipu yafa lite gi'nalo malago kofiloto Yesuhi mege'i moloto bu'ehina.

27 To babu boana'i bululu hite mege'i lifite nebago luga'a ana'magi eniginaga fi emilete yibisu kalasu hi etete lubaha'ani hosopa igo bi'ahana yabe. 28 Ya nehago Yesu i behe huloto ma luto lu epi'ehina: Lenali Yelusale ana'ise. Nani kumu'i yibi nama mehi netalo. Lenalitini'mu hiti to lenali yagapanatinimagitoga yibi nama hi epalalo. Sipi ketanauba hu epalalibe. 29 To kana alihi mone huto hilina yupahi ma lite lilana'mu: Enali ana'i yagapana'i meketose, enali yagapana'i mekete'ahana, enali ana'i yagapana'i amihi meligi'ahana, ya'ma enali bati hite minalunagihe. 30 Ya manana huto hilina yupahi enali kosamagihi ma lite lu epilana'mu: Miya kosamaka limito ifi to letobo. To bohupo'magihi lele'mo fala ki letobo, lite lilana'mu yabe. 31 Yatai ya'mana suhi yafa nogoya'a hiti ninalo nehabe ya nehana enali yafa hosopa i'ehinalo hena suhi hilana ni'ibe? ya'ma luto Yesu lu epi'ehina.

32 Enali ana hite foipa bole loemo etele'mete hiti bi'ahana. Enali Yesu hiti moneko kumu enoho fililune'mu hi'ahana yabe. 33 Enali bohupo'i mone nina kosa lataha felisa legita kosa yabe lite lilata nehanalo Yesuhi malipu yafalo nehete to foipa bole luga luga etehe'ahana yabe. Mone'i yahi lamaga'aga nehete mone'i Yesuhi yahi soga'aga malipu yafalo nehete hi'ahana. 34 Ya hite neenahago Yesu ma luto lu'ehina: Foipana'ani li he'mi epolobo, Afo'niga. Enali ya'mana li huto nehananamofihi hapa'a ya suhi nohutagihe lite keheli bati mehi'ehite nehabe. Ya noligo enali gukete'alo enali'ani kati yokolo'na hilete li futili katili hi'ahana yabe. 35 Bona'i luga'a analo ho tite minete gili gili nehago Yuta kaba bomagi Yesuhi kiya hi etete yokolo ka lu etete ma lite li'ahana: Ai fato bona'i enehe'mo'ehina yabe. To ai lusiga luto kokulumaguti o'ehina bo, Mesiau, Hu'mamofihi pana'a nohutomo ai ai'a he'malibe. Enali ya lite bai'i emite mine'ahabe. 36 Enali gimi bomagi hiti ana hite kiya yokolo hu ete'ahana. Enali gufasilo bu leba telete ekesa nagami'i emilune'mu hi'ahana yabe. 37 Ya hilete enali ma lite bai'i emilete li'ahana: Kai lusiga luto Yuta bona'magi kibina bo'ani nohutomo yalo yatai kaika kubuto bibo. 38 To fayahi mone ifo lataha'alo gete mele'ahanamofihi ka'a ma luto mino'ehina: Ma Bo Ai Yuta Bona'magi Gihiti Bo'ani Yabe.

39 Foipa bo loemo malipu yafalo Yesu hiti etahana moneuba ma luto Yesuhi bai'i emito huli ka lu eto'ehina yabe: Kai lusiga luto Mesiaga nohutomo kaika kubuto biloto le'ali'i le'ehe'mobo. 40 Ya ligo mone malipu yafalo luga'aga he'ahana bouba ana ka'a keheliloto ma luto ka emeki'ehina: Kai ai hina suhi luto kagabu noginaya kai Hu'ma kumu koli mehapihe? 41 Enali le'ali'i le'ahanaya bati hite nele'ahabe. Le'ali bati mehina suhi li huto hu'ohu'ina hapati'amu lite bati hite nele'ahabe. Ya hu'ehina ai ya'ma bouba kegeiyo huto foipana li huto mehu'ehina bo nohibe. 42 Ya luloto ma luto Yesuhi lu emi'ehina: Yesuo. Kai alihi kaba bo lolo hulotomo nani kumu'i kekesu meheno. 43 Ya ligo Yesu ma luto lu emi'ehina: Nani ma'naka luto lu nokumube. Yatai ma'asi kai nani hiti miya omihi foyagu minalu'ibe.

Yesu afili'ehina

Mt 27:45-56; Mk 15:33-41; Yn 19:28-30

44 To fuligaha kana lolo hulago analo asaga melugu metepu i baga ito buto utehi yege nesi'asi limi'ehina. 45 To ka'muya sipi mono nonugu pa sose kagamofi kumu hasa hu mele'ahanalo kata mone sipi yatamalo li putu putu tite i hekini le'ahana ya'ma folaganuguti i hegege huto i loe hu'ehina yabe. 46 To Yesu sipi kehe mone'a hiti iloto ma luto lu'ehina: Afo'niga. Kai kayanugu nemeha'ni nomolobe. Ai ya luto luloto afili'ehina yabe. 47 Gimi bomagihi kaba bo'aniuba ya'manana huto hinamofihi hapa'a bu go su holoto Hu'mamofihi gelo bi emito ma luto lu'ehina: Ma'naka luto ya'ma boya bebe sana bo yabe. 48 To asaga boana'i ete li nupa hite gili gili hana asaga'na huto higo enubu'aniguti bu ganamagihi sipi enelesa'ani ligo ya'mana fato huse'na huto hibe lite enekesa keheli keheli hilete i behe hite bi'ahana. 49 Yesuhi lalu'agi luga'a hiti to ana'i luga'a hiti Galili kapoguti Yesuhi mege'i lifite e'ahanamagi nesi'asi foto'i mino melete mine'ahana enali asaga'na Yesuhi hu etanana bu ge'ahana yabe.

Enali Yesuhi gufa efaha mulilugu mele'ahana

Mt 27:57-61; Mk 15:42-47; Yn 19:38-42

50 To bo mone mino'ehina ai gi'a Yosefe. Ai sipi hepa'i mone Yuta melugu nina hepa'i gi'a Alimatia hepato bo yabe. Ai kanisole nohuto komopa'a bati huto ni'igo bebe soto koyone huto nominana bo. 51 To ai mono kanisole bona'i luga'amagi Yesu kumu lulata hana ka'ani laga'a mebesilata hu'ehina. Ai Hu'mamofihi Kapo'a alina'mu yabe luto geba huto nominana bo. 52 Ya'mana bouba Pailatitoga buto loka hoto lu'ehina: Nani Yesuhi gufa'a lilube'mu nohunaya bati hutofi lilube'mu nohube. 53 Ya luto luloto Pailatiu: O'yo, ligo Yosefeu buto Yesuhi gufa'a malipu yafaloti lilago limiloto koholi katagu le'mo mololoto sa gi etoto lito buto muli kapo efanugu lolo hi'ahana koyapa'i fili'ehina bona'i memele'ahana ana mulilugu molo'ehibe. 54 Ya'ma kana ai fuli kanalo nete minalana nose'na li loloba huse kanagu ni'inamo to fuli kana'a yatai ahuto hilube'mu nohibe.

55 To ana'i enali Galili kapoguti ho tilete Yesuhi mege'i lifite e'ahana ana'i enali Yosefehi mege'i melete bi'ahana yabe. Ya hilete enali efaha muli'i bu ge'ahana yabe. To ana bite Yosefeu Yesuhi gufa'a hena hena huto malafi lite bu go bati hi'ahana yabe. 56 Enali abu gelete noha'aniga bila bila hi'ahana. Ya hilete enali tu mesebe hiti to hetofa kifina hiti li loloba hi'ahana yabe. To fuli yupahi enali keya kauba lu'ehina suhi hite mino fulu hite enabasu bi'ahana yabe.